CERITA LEGENDA PUTRI PINANG MASAK DALAM BAHASA LOKAL SUMATERA SELATAN (BAHASA MERANJAT OGAN ILIR)

LEGENDA RAKYAT : PUTRI PINANG MASAK (DALAM BAHASA MERANJAT)

Makam Putri Pinang Masak di Desa Senuro Kec Tanjung Batu Kab Ogan Ilir

Konon nurut cerito, kurang lebeh 350 taun nyang duluni, tesebutlah sorang putri nyang benamo Napisah dan begelar Putri Pinang Masak. Putri Pinang Masak tu beasal dari Banten, Jawo Barat. Diok bediam di Empat Ulu Laot, Plembang. Pado maso itu Plembang dipimpin oleh urang yang namonyo Sunan. Sunan iko tekenal nare kesenangan ngompolkan gadis-gadis belagak, pati nak dijadikan dayang di istanonyo.

Suatu ketiko tesebar sekok berito bahwo di seberang Ulu Plembang ado sorang betino nyang benamo Putri pinang Masak. Betino iko belagak nian dan. taknare bandingannyo di Kerajoan Plembang. Berito Kebelagak-an Putri Pinang Masak akhirnyo sampai ketelingo Sunan Plembang. mako timbulah niat Sunan nak muktikan kebenaran cerito tu dan nak mliat secaro langsung nian kebelagak-an putri tu dari parak, sudah tu mun ado nian cerito tu, Putri Pinang Masak nak dijadikenyo dayang di istano Sunan.

Putri Pinang Masak nengar kabar bahwo diok di cari Sunan, dan nak dibawo ke istano nak dijadikan dayang tu sedeh laju ati Putri tu, laju Putri betekad lebeh baek mati dari pado jadi dayang Sunan. Tapi nak ngelakkan surean Sunan tu tak kenado, kareno sunan tu nare kekuasaan nyang sangat kuat, dan jugo nare Hulubalang dengan Pengawal nyang sangat gagah. Sedangkan Putri sorang nyang tak bedayo.

Sang Putri dan keluargonyo bepiker dan merenung bakmano caronyo keluar dari balak iko. akhirnyo tebayang sekok caro nak ngiukkan wargo istano. Sebelum jemputan dari istano datang, Sang Putri merebus jantung pisang. Apan aer rebusan la bangso dingin, laju Sang Putri mandi aer itu tu. Akibat mandi aer rebusan jantung pisang iko badan dengan rai Putri Pinang Masak jadi itam pekat, dan kebelagak-annyo ilang. Bukan itu bae, badan Putri tliat cak kotor dan siapo be nyang meliatnyo raso cemek nian.

            Dang keadaan Putri burek bak ikolah, tibo-tibo datanglah pengawal istano nak nyemput Sang Putri. Pengawal pun tekanjat, sudah tu ragu apo iko urangnyo Putri Pinang Masak nyang blagak yang meramekan Negeri tu, apo bukan. Tapi kareno iko di seruh perintoh Rajo nyang tak acak di langgar, akhirnyo Putri di bawo tula ke istano. Sampai di depan Sunan, Sunan tekanjat nian mliat Putri yang di beritokan tu ternyato Putri tu jahat, burek, laju di user Sunan Putri tu. Sang Putri pun begopo-gopo ninggalkan istano dan balek kerumahnyo. Putri ragap nian kareno kepintarannyo berasel.

         Alkisah nurut ceritonyo, Putri Pinang Masak tak suda-suda dirundung balak. Lepas dari sekok kesusahan, disusel pulo ole kesusahan nyang lain. Bak uji pepatah tu “Malang tak acak ditolak, mujur tak acak diraeh”. Ruponyo berito kebelagak-an Putri Pinang Masak tu maseh bae tesebar di galo kerajoan, bahkan banyak bujang-bujang terutamo anak Rajo nyang tegilo-gilo. Masalah iko akhirnyo sampai pulo ketelingo Sunan. Sunan meraso tekiuk dan timbel niat di atinyo pengen nian meliat rupo Putri nyang sebenarnyo.

            Akhirnyo para penyelidik pacak muktikan bahwo berito nyang tesebar tu benar nian. Bahwo Putri Pinang Masak tu belagak nian dan taknare bandingan di segalo negeri. Diceritokan ole Pengawal bahwo ketiko diadokkan ngari Sunan berapo ari nyang lewat tu, Putri Pinang Masak ternyato sengajo ngoba rainyo kareno diok tak endak dijadikan Dayang di istano. Sunan meraso tekiuk, laju merentakan Hulubalang dan Pengawal agar makso nangkap Putri Pinang Masak, sudah tu mawonyo ke istano. Berito penangkapan iko sampai pulo ketelingo Sang Putri. Sedeh nian ati Sang Putri tak pacak lagi ngatokenyo. Sambil besedeh, Putri marak-i kanconyo nyang setio, nak berunding bakmano caron dan usahanyo agar telepas dari tangkapan Sunan.

            Sudah berunding tegal, mako diambeklah sekok keputusan, iyola melarikan diri. Pado suatu malam, bebarangan dengan empat kanconyo nyang setio dang duo Pengawal, urang bitu pegi ninggalkan ruma. Urang bitu ninggalkan ruma dengan perahu nuju ke Ulu sungai Ogan. Bebulan-bulan beperahu, urang bitu sampai di lebak, nyang namonyo lebak Meranjat. sudah tu beperahu pulo melewati teluk Lancang, sudah tu melewti aer nyang deras nian. Sambel beperahu itulah dicari tempat yang aman dan tak kenado ditemukan oleh pengawal istano. Laju akhirnyo Putri dengan kanco-kanconyo tu diam di dusun yang namonyo Senuro. Namo iko diambek dari namo Sang Putri kareno jak diam di bitu Sang Putri ngoba namonyo dengan Putri Senuro.

            Di tempat nyang baru iko, Sang Putri leman jadi kesenangan bujang-bujang. Terutamo anak-anak urang gerot  Di tempat nyang baru iko jugo Putri Pinang Masak ngajarkan beberapo kepacak-an dengan gadis-gadis di bitu. Kepacak-an itu berupo keterampelan nganyam bilah-bilah bule nyang dibuat untuk alat-alat ruma tango, misalnyo bakel, telindak, dan sebagainyo. Sampai bak iko ari betino-tino di senuro pacak nganyam. Nurut ceritonyo, Putri Pinang Masak pacak nganyam bakel nyang tak tembus aer.

            Suatu ari, Putri Pinang Masak sakit. Kian lamo, sakitnyo kian parah. Sang Putri meraso diok nak mati. Dang terakhir dang gawat tu, Putri Pinang Masak sempat besumpa atau bedoa. Sumpah tu bebunyi “ Aku mintak dengan Tuhan agar anak cucengku kagi jangan belagak cak aku, kareno kebelagak-an tu nak mawo kesengsaroan, pecak nyang ku rasoi”.

            Suda ngucapkan sumpa itu tu, Sang Putri ngembuskan napas nyang terakhir. Beliau mati ninggalkan empat kanco nyang setio dengan duo Pengawal nyang lalu setio nyagonyo.Suda Sang Putri mati, kanco-kanco nyang setio dan jugo pengawalnyo bejanji nak netap diam dibitu, jugo nak mati tak keberkan di pingger keberan Putri, Kalu kito datang ke keberan Putri senuro, kito bakal tliat di keberan kanco-kanco, pengawal sang Putri.